अमेरिकामा शक्तिशाली आँधी, झण्डै दर्जनौको ज्यान गयो

काठमाडौँ ; संसार भर विभिन्न किसिमका विपत्तका घटनाहरु सार्वजनिक भइरहेको अवस्थामा भर्खरै त्यस्तै भएको छ । अमेरिकाको दक्षिणी क्षेत्रमा आएको शाक्तिशाली आँधीका कारण कम्तीमा ११ जनाले ज्यान गुमाएका छन् ।

आँधीसँगै कडा हावाहुरी र बाढी पनि आएकाले मानवीय क्षति भएको अधिकारीले बताएका छन् । घटनामा परी ज्यान गुमाएका मध्य एक जना प्रहरी र एक जना उद्धारकर्तासमेत रहेको जनाइएको छ। टेक्सासको लुब्बुकमा शनिबार बिहान उनीहरुको ज्यान गएको हो ।

त्यसैगरी, ओक्लाहोमामा पनि बाढी र बर्षासँगै आँधी आएको थियो। त्यस क्षेत्रमा खटिएको गस्ती टोलीले शनिबार दिएको जानकारीअनुसार आँधीका कारण सवारीसाधन बाटोमै रोकिएका थिए।

वृद्धवृद्धाको एउटा जोडी शनिबार लुइसियानानजिकै शनिबार मृत अवस्थामा भेटिएका थिए भने अर्का एक जनाको इओवामा मृत्यु भएको थियो। आँधीपछि टेक्सासदेखि ओहियोसम्मका हजारौं घरमा विद्युत सेवा अवरुद्ध भएकाले लाखौं मानिस विद्युत् सेवाविहीन अवस्थामा रहेको सरकारी अधिकारीलाई उद्धृत गर्दै चिनियाँ समाचार एजेन्सी सिन्ह्वाले जनाएको छ।

आँधीकै कारण कतिपय राजमार्ग पनि बन्द भएका छन्। विषेशगरेर ओक्लाहोमा र अर्कान्सासमा बाढी आएकाले बाटो बन्द भएका हुन्। त्यसैगरी, सिकागोका दुई अन्तर्राष्ट्रिय विमानस्थलबाट उड्ने एक हजार २ सय भन्दाबढी उडान सेवा स्थगित भएको अधिकारीले जनाएका छन्।

विमानस्थलका अधिकारीका अनुसार ओहारे अन्तर्राष्ट्रिय विमानस्थलबाट मात्रै ९ सय ५० भन्दाबढी उडान स्थगित भएका हुन्। शनिबार बिहानैदेखि आइतबार दिउँसोसम्मका सेवा बन्द गरिएको उनीहरुले जानकारी दिएका छन्। शनिबार रातभरी र बिहानसम्म पनि बर्षा भएको उनीहरुले बताएका छन्।

  •  
  •  
  •  
  •  
  •  
  •